17.08.12 - INCAMAKE Y’ICYUMWERU - BEMBA YATANGIYE KWIREGURA, KAGAME, KABILA NA MUSEVENI BARAREZWE

Arusha, 17 Kanama 2012 (FH) –Jean-Pierre Bemba, wahoze ari visi perezida wa Kongo, yatangiye kwiregura imbere y’urukiko mpanabyaha mpuzamahanga. Muri urwo rukiko na none, itsinda ry’abanyekongo n’abanyarwanda batavuga rumwe n’ubutegetsi ryatanze ikirego kuri Kagame, Kabila na Museveni. 

CPI

Jean-Pierre Bemba yatangiye kwiregura: uyu musenateri wari na visi perezida wa Repubulika iharanira demukarasi ya Kongo (RDC) ku wa kabiri yatangiye kwiregura. Jean-Pierre Bemba ashinjwa ibyaha by’intambara n’ibyaha byibasiye inyokomuntu. Ibyaha aregwa ngo byaba byarakorewe muri Centrafrique mu mwaka wa 2002 n’uwa 2003 n’abarwanyi be bimbumbiye mu mutwe wo kubohora Kongo (MLC). Umutangabuhamwa wa mbere yatanze umurongo mugari w’imyiregurire ye. Umujenerali w’umufaransa uri mu kiruhuko cy’izabukuru, Jacques Seara, yemeje ko uregwa atashoboraga kuyobora ingabo ze aho zari mu birindiro muri Repubulika ya Centrafrique.

Hatanzwe ikirego ku ba perezida batatu: amashyaka atavuga rumwe n’ubutegetsi n’amashyirahamwe y’abanyarwanda bari mu buhungiro ku wa gatanu bashyikirije urukiko rwa CPI ikirego baregamo perezida w’u Rwanda, uwa Kongo n’uwa Ouganda. Abarega barasaba urukiko gukurikirana perezida Paul Kagame, Joseph Kabila na Yoweri Museveni kubera ibyaha byakorewe muri Repubulika iharanira demukarasi ya Kongo (RDC).

Urukiko rwa CPI rwemeje ko rufite ububasha bwo kuburanisha Gbagbo : urukiko rwa CPI, ku wa gatatu, rwaburijemo, ikirego cyatanzwe n’abunganizi ba Laurent Gbagbo mu mpera z’ukwezi kwa Gicurasi kivuga ko rudafite ububasha bwo kumuburanisha. Abunganizi be bashimangiraga ko igihugu cya Côte d’Ivoire cyashyigikiye gusa ububasha bw’uru rukiko ku byaha byakozwe hagati ya Nzeri 2002 na Mutarama 2003 hatarimo ibyaha byakozwe mu mwaka wa 2010 ari na byo uyu wahoze ari perezida akurikiranyweho

ICYUMWERU GITAHA

Umujenerali w’umufaransa uri mu kiruhuko cy’izabukuru Jacques Seara, umutangabuhamya wa mbere ushinjura uwahoze ari visi perezida wa RDC, Jean Pierre Bemba, azakomeza gutanga ubuhamya bwe imbere y’urukiko rwa CPI, guhera ku wa kabiri.

SRE/ER

© Agence Hirondelle