09.03.10 - TPIR/NSENGIMANA - UMUSHINJACYAHA NTAZIRIRWA AJURIRA IREKURWA RY'UMUPADIRI

Arusha, 09 Werurwe 2010 (FH) - Ibiro by'umushinjacyaha w'urukiko mpuzamahanga mpanabyaha rwashyiriweho u Rwanda (TPIR) byafashe icyemezo cyo kutazajurira mu rubanza rwa Hormisdas Nsengimana, wahanaguweho ibyaha n'urw'iremezo tariki ya 17 Ugushyingo 2009.

Icyo cyemezo cy'umushinjacyaha mukuru gitumye rero imyanzuro y'urw'iremezo iba kamara.

TPIR mu kanyamakuru kayo gasohora buri kwezi, nimero ya Gashyantare, irandika ko «  Ubushinjacyaha byatangaje ko budateganya kujuririra irekurwa rya Nsengimana."

Mu gihe cya jenoside ya 1994, Padiri Nsengimana, wari ukurikiranyeho icyaha cya jenoside, ubuhotozi n'itsembatsemba, yari umuyobozi wa College ya Kristu Mwami i Nyanza, rimwe mu mashuri yari akomeye mu gihugu. Yahigishaga ikilatini, n'iyobokamana, akanahayobora na za misa.

Yaregwaga kuba yarahagarikiye ubwicanyi bw'abatutsi muri iryo shuri rye no mu nkengero zaryo. Ubushinjacyaha bwashyigikiraga ko by'umwihariko, yari yaragize uruhare mu bwicanyi bw'abagore batari bake, n'abapadiri b'abatutsi.

Urukiko rw'iremezo rwasanze ibimenyetso byatanzwe n'ubushinjacyaha nta reme rihagije byari bifite ryashoboraga kwemeza icyaha uwo mupadiri.

TPIR muri iki gihe icumbikiye abandi bantu batatu bahaganuweho ibyaha bagitegereje ibihugu byabakira. Abo ni André Ntagerura wahoze ari ministri wo gutwara abantu n'ibintu, jenerali Grasiyani Kabiligi na Protazi Zigiranyirazo, muramu wa nyakwigendera Yuvenali Habyarimana.

Abantu babiri bahanaguweho icyaha na TPIR, ba burgmestri Ignace Bagilishema, na Jean Mpambara bakiriwe n'Ubufransa, Emmanuel Bagambiki wahoze ari prefe aba mu Bubiligi mu gihe André Rwamakuba wahoze ari ministri w'uburezi yasanze umuryango we mu Busuwisi.

PU/ER

© Agence Hirondelle