20.10.10 - TPIR/KALIMANZIRA - KALIMANZIRA YAGABANYIRIJWEHO IMYAKA 5 MU RW'UBUJURIRE

  • Imprimer
Arusha, 20 Ukwakira 2010 (FH) - Urugereko rw'ubujurire rw'urukiko mpanabyaha mpuzamahanga rwashyiriweho u Rwanda (TPIR) ku wa mbere rwagabanyijeho imyaka 5 ku gihano uwahoze ari umukozi mukuru wa Leta, Kalisiti Kalimanzira, wari warakatiwe imyaka 30 y'igifungo mu rw'iremezo.

Umucamanza uyoboye abandi muri urwo rubanza Theodor Meron yagize ati: " urugereko rw'ubujurire, rucirae uru rubanza mu ruhame, umucamanza Fausto Pocar yafashe icyemezo kinyuranyije n'icya bagenzi be, rugabanyije igihano cy'imyaka 30 y'igifungo Kalimanzira yari yarakatiwe  mu rugereko rw'iremezo gishyizwe ku myaka 25 y'igifungo".

Uyu mucamanza w'umunyamerika, wasomaga incamake y'urubanza mu rurimi rw'icyongereza yakomeje agira ati: "rutegetse ko Kalimanzira aba agumye mu maboko y'urukiko ategereje ko ubwumvikane n'imyiteguro yo kumujyana mu gihugu azarangirizamo igihano irangira".

Ku itariki ya 22 Kamena 2009, uwahoze ari umuyobozi w'ibiro bya minisitiri w'ubutegetsi bw'igihugu, ubu ufite imyaka 57, yari yahamwe n'icyaha cya jenoside n'icyo guhamagarira abandi mu ruhame gukora jenoside, by'umwihariko kuri za bariyeri zitandukanye mu mihanda no ku musozi wa Kabuye, mu cyahoze ari perefegitura ya Butare, hafi y'umupaka w'u Rwanda n'u Burundi.

Urugereko rw'ubujurire rwamuhamije icyaha cya jenoside kubera gutiza umurindi ubwicanyi bwakorewe abatutsi bari bahungiye kuri uwo musozi uzwi cyane kubera umubare munini w'abantu bahiciwe ku gicamunsi cyo ku itariki ya 23 Mata 1994.

Nk'uko byavuzwe n'abatangabuhamya mu rubanza mu rugereko rw'iremezo, abatutsi b'i Kabuye bagabweho ibitero n'abapolisi, abajandarume ndetse n'abasivili, bamwe muri bo bakaba bari impunzi z'abarundi.

PU/ER

© Agence Hirondelle