21.02.05 - TPIR/RWAMAKUBA - RWAMAKUBA AZABURANISHWA WENYINE
RWAMUKUBA AURA UN PROCES INDIVIDUEL
VOA kinyarwanda le 18 février 2005
Résumé
L’ex-ministre de l’enseignement primaire et secondaire, André Rwamakuba, ne sera plus jugé avec des anciens responsables de l’ex-parti présidentiel. La chambre a indiqué avoir pris cette décision dans l’intérêt de la justice.
Le procureur avait introduit cette demande en décembre 2004.
Umutwe
Andreya Rwamakuba, wari minisitiri w’amashuri abanza n’ayisumbuye muri 1994, amaze gutandukanywa n’abo bari barahurijwe mu rubanza rumwe mu rukiko rw’Arusha. Ni inkuru twateguriwe na Agustini Twagirayezu, umunyamakuru wa Fondation Hirondelle.
Igihimba
Andreya Rwamakuba, wari minisitiri w’amashuri abanza n’ayisumbuye muri guverinoma yashyizweho mu kwezi kwa kane muri 1994 yaburanishwaga hamwe n’abandi bantu batatu bahoze ari abayobozi bakuru b’ishyaka MRND ry’uwahoze ari umukuru w’igihugu, Yuvenali Habyarimana.
Umushinjacyaha rero amaze kwemererwa kumukurikirana wenyine, abacamanza bakavuga ko icyo cyemezo bagifashe mu nyungu z’ubutabera.
Andreya Rwamakuba yari mu rubanza rumwe na Matayo Ngirumpatse wari perezida w’ishyaka MRND, Edouard Karemera, wari visi perezida waryo, akaba na minisitri w’ubutegetsi bw’igihugu, na Yozefu Nzirorera, wari umunyamabanga mukuru w’iryo shyaka, akaba na perezida w’inteko inshinga amategeko y’agateganyo yashyizweho muri 1994.
Urubanza bari barahurijwemo rwari rwaratangiye mu kwezi kwa cumi na kumwe mu mwaka w’2003.
Mu kwezi kwa gatanu umwaka ushize cyokora rwaje guhagaragara, bitewe n’uko umucamanza waruyoboraga, Umunyasenegalikazi Andresiya Vaz, yaruvuyemo, biturutse ku gitutu cy’abunganira abaregwa. Bamukekaga kuba yari abogamiye ku bushinjacyaha.
Icyo gihe urubanza ruhagarara,umushinjacyasha yari amaze guhamagaza abatangabuhamya 11.
Nyuma y’aho umucamanza Andresiya Vaz aviriye muri urwo rubanza ntirwashoboye gukomeza ukundi, kuko abunganira abaregwa batahagarariye aho, ahubwo bakomeje gusaba ko rwongera gutangira bundi bushya.
Mu kwezi kwa cyenda umwaka ushize barabyemerewe, urukiko rw’ubujurire rumaze kubona ko abacamanza bari bafatanyije na Mme Vaz kuruburanisha nabo hari ibyo bakemangwa.
Kuva icyo gihe nta tariki nshya yo kurutangira iratangwa. Abacamanza bazaruburanisha nabo ntibaramenyekana bose, uretse gusa uzaruyobora, Dennis Michael Byron ukomoka mu birwa bya Saint-Kitts na Nevis biri mu nyanja ya Caraïbe.
Abacamanza bemereye umushinjacyaha gutandukanya Rwamakuba n’abo baregwaga hamwe, bamaze kubona ko bitazagira uwo bibangamira muri bo. Ikindi kandi ngo ibyo akurikiranyweho byarushije gusobanurwa.
Aho urubanza rwari rugeze, abatangabuhamya baregaga Rwamakuba ubwicanyi bwakorewe mu ntara ya Butare, ariko cyane mu bitaro bya kaminuza y’u Rwanda, aho yakoze igihe kirekire ari umuganga no muri komini avukamo ya Gikomero mu ntara ya Kigali ngari. Ibyaha byose yarabihakanye.
Andreya Rwamakuba yafatiwe muri Namibiya muri 98. Mbere y’uko atangira kuburanishwa, yari yarasabye kenshi urubanza rwa wenyine, ariko ntiyabyemererwa.
Ibyo biri mu byatumye atigera aza mu rubanza rwe kugeza aho ruhagaragariye, yinubira uburyo ubushinjacyaha bwakurirkiranye dosiye ye.
Andreya Rwamakuba yunganirwa n’abavoka babiri: Me David Hooper w’Umwongereza na Me Andreas Oshea wo muri Afurika y’epfo.
Ku byaha 11 yari akurikiranyweho, ubu hasigaye bine. Mu byo ubushinjacyaha bwavanyeho harimo icyaha cyo gukangurira abandi gukora itsembabwoko no kugirira abari n’abategarugori ibya mfura mbi.
Ubwo byamenyekanaga ko umushinjacyaha yari afite umugambi wo kureka kumukirana ku cyaha cyo kugirira abari n’abategerugori ibya mfura mbi, kubera kubura ibimenyetso bifatika, uhagarariye u Rwanda mu rukiko rw’Arusha yarabyamaganye cyane.
Bwana Aloys Mutabingwa yavuze ko nta nsobanuro bifite, yongeraho ko kugiririra abagore n’abakobwa ibya mfura mbi ari ibintu byagaragaye cyane mu gihe cy’itsembabwoko, bityo bikaba bitaburirwa ibimenyetso.
Agustini Twagirayezu, umunyamakuru wa Fondation Hirondelle, wateguriye iyi nkuru Ijwi ry’Amerika.
AT/FH(VOA’’’0218)